Bashkimi Evropian ka hedhur poshtë fushatën globale të Rusisë për furnizim me vaksina Sputnik-V. Por sipas burimeve të agjencisë së lajmeve Reuters, prapa skenave BE-ja synon të kthehet të vaksina ruse.
Një zyrtar i BE-së i cili negocion me prodhuesit e vaksinave në emër të bllokut, i tha Reuters se qeveritë evropiane po shqyrtonin fillimin e bisedimeve me zhvilluesit e Sputnik V. Sipas tij do të duheshin kërkesa nga katër shtete të BE-së për të filluar procesin.
Hungaria dhe Sllovakia tashmë kanë blerë vaksinën ruse.
Sipas zyrtarit, Republika Çeke është e interesuar dhe se Italia po e konsideronte të përdorte bioreaktorin më të madh të vendit, për prodhimin e vaksinave në një fabrikë ReiThera, pranë Romës.
Brukseli është kritikuar për shpërndarjen e ngadaltë të vaksinave të bllokut në një kohë kur ish-anëtarja e tij Mbretëria e Bashkuar po lehtëson kufizimet.
Nga ana tjetër, Italia po intensifikon bllokimet, spitalet në rajonin e Parisit janë afër mbingarkesës dhe Gjermania ka paralajmëruar një valë të tretë.
BE-ja ka nënshkruar marrëveshje me gjashtë prodhues të vaksinave perëndimore dhe ka filluar bisedime me dy të tjera. Ajo ka aprovuar katër vaksina deri më tani, por problemet e prodhimit kanë ngadalësuar fushatën e saj të inokulimit dhe disa shtete anëtare po kërkojnë zgjidhjet e tyre.
Nëse Sputnik V do të bashkohej me arsenalin e vaksinave të BE-së, do të ishte një triumf diplomatik për Rusinë, tregtia e së cilës me bllokun është penguar prej vitesh nga sanksionet mbi aneksimin e saj të Krimesë dhe ndërhyrjen e saj në Ukrainën lindore.
Do të rrezikonte gjithashtu ndarjen e bllokut midis atyre shteteve të vendosura kundër dhënies së fitores ndaj Moskës dhe atyre në favor të bashkëpunimit mes Brukselit dhe Kremlinit.
