Ka një javë që kanë filluar të mbledhin nënshkrime për një peticion që kërkon zgjedhje të reja nacionale në Kosovë. Mbledhja e nënshkrimeve po bëhet nëpër të gjitha sheshet e qendrave më të mëdha në Kosovë. VV bën të ditur se deri më tani janë mbledhur 150 mijë nënshkrime. 

‘’Për një javë 150 mijë nënshkrime. Sot u bënë një javë prej kur filluam mbledhjen e nënshkrimeve në peticionin online për të vazhduar të nesërmen edhe atë fizik gjithandej nëpër Republikën e Kosovës. Kërkesa është një: “Duam Zgjedhje!”, ndërkaq përgjigja qytetare është e jashtëzakonshme në mbështetje të kësaj kërkese të drejtë dhe legjitime përkundër atyre që pasi tradhtuan vullnetin e shprehur me 6 tetor vazhduan edhe ta vjedhin atë. Me vullnet të vjedhur nuk do të mund as të qeverisin e as të përvjedhin ndonjë marrëveshje të dëmshme për vendin.’’, thotë faqja zyrtare e VV’së në Facebook. 

Tutje bëhet e ditur se do të shkohet edhe nëpër fshatra e lagje për të rritur numrin e nënshkrimeve. 

‘’Deri sot janë mbledhur 150 mijë nënshkrime dhe peticioni ende po vazhdon. Ditëve në vijim do të fillojmë mbledhjen e nënshkrimeve edhe në çdo fshat e lagje për të lehtësuar procesin e nënshkrimit të peticionit për të gjithë qytetarët që duan ta plotësojnë atë.’’.