Presidenti i FC Prishtinës, njëherësh edhe pronar i kompanisë “Eurokoha” dhe “Kosova Airlines”, Remzi Ejupi, më 23 mars (të shtunën), ka dorëzuar një mijë teste për Covid-19 në Institutin Kombëtar të Shëndetësisë Publike të Kosovës, transmeton Gazeta Metro.

Pranimin e këtij donacioni e ka konfirmuar edhe zëdhënësi i Ministrisë së Shëndetësisë, Faik Hoti, i cili tutje ka thënë se ka marrë premtime nga Ejupi se do të sigurohen edhe 11 mijë kite tjera për testim ndaj virusit.

“Remzi Ejupi ka dorëzuar të shtunën 1000 kite në IKSHPK. Ka premtuar se është duke i pritur edhe 11,000 të tjera nga prodhuesit në Gjermani për t’i sjellë në Kosovë”, ka thënë Hoti për Zërin. 

Ditë më parë, Ejupi tha se ka mundësi që të sigurohen deri në 20 mijë kite për testim ndaj COVID-19. Ai tha se fillimisht në IKSHPK do të dorëzohen 1 mijë teste të këtilla, e pas pak edhe 11 mijë tjera.