Lëvizja Vetëvendosje (LVV), ka vendosur që mos të dorëzohet edhe pas ratifikimit të Marrëveshjes së Demarkacionit me Malin e Zi, pasi do t’i drejtohen Gjykatës Kushtetuese.
Kështu ka bërë të ditur në një prononcim për Telegrafin, deputetja e Kuvendit të Kosovës nga LVV, Albulena Haxhiu.
Haxhiu tha se janë duke përgatitur lëndën për ta dorëzuar në Gjykatën Kushtetuese, pasi siç tha ajo me këtë marrëveshje është cenuar integriteti territorial i vendit.
“Në fakt atë natë kur kaloi Marrëveshja për demarkacionin, ku deputetët me votën e tyre e legjitimuan aktin e tradhtisë së Hashim Thaçit, jemi mbledhur për ta dërguar në Gjykatën Kushtetuese këtë marrëveshje. Me votën e tyre deputetët e Kuvendit të Republikës së Kosovës cenuan rëndë integritetin territorial, e cila është njëra prej elementeve kryesore për shtetin, siç është territori. Afati kohor që kemi në dispozicion është tetë ditë dhe besoj që në fund të javës së ardhshme do ta kemi gati për ta dërguar”, ka thënë deputetja Haxhiu.
Ajo gjithashtu u shpreh optimiste se kësaj here Gjykata Kushtetuese do të respektojë Kushtetutën e Republikës së Kosovës.
