Kryeministri i Kosovës, Ramush Haradinaj, mori sot pjesë në pritjen solemne me rastin e Festës së Krishtlindjes, e cila u mbajt në Katedralen “Shën Nënë Tereza” në Prishtinë, të organizuar nga Ipeshkvia Prizren-Prishtinë.
Me këtë rast, kryeministri Haradinaj ka shprehur urimet më të përzemërta për të gjithë besimtarët e besimit katolik, duke i uruar në këtë ditë të shenjtë për ta, duke thënë se tek shqiptarët ndër shekuj është kultivuar tradita dhe harmonia fetare si vlerë humane dhe civilizuese.
Në fjalën e tij përshëndetëse, Ipeshkvi i Kosovës, Imzot Dodë Gjergji, bëri thirrje për dialog, paqe dhe dashuri në mes të njerëzve, duke thënë se sot festojnë të gjithë si miq dhe si besimtarë, duke përçuar mesazhin e dashurisë dhe paqes te të gjithë njerëzit në Kosovë.
Të pranishëm në këtë pritje solemne ishin përfaqësues institucionalë, klerikë fetarë, përfaqësues të institucioneve ndërkombëtare në Kosovë dhe qytetarë të shumtë.
