Ministria e Bujqësisë dhe Zhvillimit Rural në Shqipëri sqaron se në përputhje me situatën e Influencës Aviare  të konstatuar në dy stabilimente në zonën e Durrësit, janë marrë masa të menjëhershme për të parandaluar përhapjen e mëtejshme të gripit të shpendëve.

Pasi u konstatua sëmundja, janë eliminuar dhe asgjësuar 497,986 krerë shpendë të ngordhura, duke u përdorur metoda të sigurta si Rendering për trajtimin dhe asgjësimin e tyre.

Ky proces u realizua duke u bazuar në legjislacionin në fuqi, që parashikon përdorimin e metodave të sigurisë si groposja ose djegia e shpendëve në qendrat e përpunimit, në përputhje me rregullat sanitaro-veterinare.

Për të garantuar sigurinë dhe efektivitetin e këtij procesi, janë angazhuar autoritetet e veterinarisë dhe përfaqësues të Ministrisë së Bujqësisë dhe Zhvillimit Rural, të cilët kanë mbikëqyrur çdo hap të procesit të asgjësimit, duke siguruar që çdo veprim të kryhet sipas standardeve dhe ligjeve të përcaktuara./RTSH