Kryeministri i Mbretërisë së Bashkuar, Keir Starmer, ka arritur në Kiev për ta nënshkruar atë që Qeveria britanike po e quan partneritet 100-vjeçar kyç me Ukrainën.
Përmes këtij pakti do të formalizohet mbështetja ekonomike dhe ushtarake për të cilën Britania tashmë është zotuar për Ukrainën dhe do të ofrohet edhe më shumë, raporton televizioni BBC.
Kjo është vizita e parë e kryeministrit britanik në Ukrainë që nga ardhja në pushtet vitin e kaluar në atë që shihet si shfaqje e mbështetjes për Ukrainën pak ditë para rikthimit të republikanit Donald Trump në Shtëpinë e Bardhë.
Presidenti ukrainas, Volodymyr Zelensky, është i interesuar për t’i diskutuar garancitë e sigurisë nga aleatë kyçë si Britania, me dyshimin se administrata e re amerikane mund të fillojë që ta shtyjë Ukrainën drejt paqes me Rusinë.
Starmer u prit në stacionin e trenit në Kiev nga ambasadori britanik në Ukrainë, Martin Harris, dhe nga ambasadori ukrainas në Londër, Valerii Zaluzhnyi.
Duke folur gjatë vizitës, kryeministri britanik tha: “Kjo nuk ka të bëjë vetëm me këtu dhe tani, por është gjithashtu një investim në dy shtetet tona për shekullin e ardhshëm.”
