Ministri i Shëndetësisë, Arben Vitia bëri të ditur se në Kosovë nuk është paraqitur asnjë rast me HMPV, virusin që së fundmi ka shtuar rastet në Kinë duke u përhapur edhe në shumë vende të botës.
Në një konferencë për media, ai theksoi se janë marrë të gjithat masat në rast nevoje për të përballuar çdo situatë rreth këtij virusi i cili ka shpërthyer së fundmi në Kinë.
Vitia u shpreh se nuk duhet të ketë asnjë lloj panike për këtë virus, shkruan gazeta online Reporteri.net.
“Sipas informacioneve Nuk kemi akoma rast me HMPV. Jemi të përgatitur. IKSHPAK dhe Minsitra e Shëndetësisë janë në kontakt me të gjitha mekanizbat që ekzisojnë sot në botë rreth kësaj sëmundje, dhe jemi në kontakt me OBSH dhe çdo institucion tjetër. Në momentin e parë që paraqitet një rast, menjëherë merren masat me rekomandimet e IKSHPK-së.
Asnjë lloj panike nuk ka për qytetarët. IKSHPK dhe SHSKUK veç kanë filluar masat dhe përgatitjet. Nëse do të kishte arsye për panik, ne do të kishim dalë me informata , nuk ka asnjë arsye për të pasur panik për këtë”, ka thënë Vitia.
Çfarë është HMPV?
Është një nga disa patogjenë që qarkullojnë në mbarë botën çdo vit, duke shkaktuar sëmundje të frymëmarrjes. HMPV është i zakonshëm – aq i zakonshëm sa që shumica e njerëzve do të infektohen ndërsa janë ende fëmijë dhe mund të përjetojnë disa infeksione gjatë jetës së tyre. Në vendet gjatë muajve të ftohtë HMPV mund të ketë një sezon vjetor, njësoj si gripi, ndërsa në vende më afër Ekuatorit ai qarkullon në nivele më të ulëta gjatë gjithë vitit.
HMPV është i ngjashëm me një virus që njihet më mirë në Shtetet e Bashkuara – virusi sincicial i frymëmarrjes, ose R.S.V. Shkakton simptoma të ngjashme me ato të gripit dhe Covid-it, duke përfshirë kollën, temperaturën, kongjestionin e hundës dhe frymëmarrjen.
Shumica e infeksioneve HMPV janë të lehta, të ngjashme me periudhat e ftohjes së zakonshme. Por rastet e rënda mund të rezultojnë në bronkit ose pneumoni, veçanërisht tek foshnjat, të rriturit e moshuar dhe njerëzit me imunitet të kompromentuar. Pacientët me kushte para-ekzistuese të mushkërive, të tilla si astma, sëmundja kronike obstruktive pulmonare ose emfizema, janë në rrezik më të lartë të rezultateve të rënda.
Në vendet me të ardhura më të larta, virusi është rrallë fatal; në vendet me të ardhura më të ulëta, me sisteme të dobëta shëndetësore dhe mbikëqyrje të dobët, vdekjet janë më të zakonshme.
