Pasi mediat serbe kanë raportuar se personi i cili po kërkohet për vrasjen e policit serb në Loznicë, është i arratisuri nga burgu i Kosovës duke aluduar në emrin e Artan Hajrizit, ky i fundit e mohon të ketë pasur dorë në këtë rast.
Vëllai i të arratisurit, Faton Hajrizit, Artani në një bisedë me Telegrafin tregoi se ndodhet në Gjermani.
Ai tha se Fatoni ka qëndruar dy ditë tek shtëpia e tij dhe ia ka vjedh dokumentet e tij.
“Mi ka marr dokumentet, ka qenë para dy dite. Dy ditë ka nejt dhe ka ec. Unë jam në Gjermani me tesha të punës, e s’kam bo asgjë. Shkurt mi ka vjedh dokumentet”, ka thënë Artan Hajrizi.
I pyetur se a i ka thënë ndonjë gjë Faton Hajrizi në dy ditë qëndrimi tek Artani, ai tha: “Hiç kurrgjë, s’më intereson”.
Telegrafi bisedën e zhvilloi përmes WhatsApp-it me kamerë, në të cilën ai shihej me rroba të punës dhe në stacion policor.
Ndryshe, siç raportonin mediat në Serbi sot në orët e para të mëngjesit të sotëm në pikëkalimin kufitar në Loznicë të Serbisë pranë kufirit me Bosnje e Hercegovinën, pasi policia ndaloi për kontroll një veturë të markës Mercedes, brenda të cilës gjendeshin dy persona, i dyshuari doli nga vetura dhe shtiu mbi një polic serb, që e qëlloi në gjoks dhe nuk i mbijetoi plagëve.
Ai gjithashtu shtiu edhe mbi një zyrtar tjetër policor, i cili mbeti i plagosur, kurse i dyshuari është larguar nga vendi i ngjarjes.
