Përparim Hetemaj e ka zemrën e ndarë në gjysmë. Në njërën anë Kosova, të cilën e kishte braktisur pa dëshirë kur ishte fëmijë, pak para se të niste lufta.

Në anën tjetër Finlanda, një vend në të cilin është rritur dhe të cilin sot e thërret shtëpi.

E në mes të tyre gjendet Italia, një vend që ia realizoi ëndrrën: të bëhet futbollist kulmor.

Mirëpo, në kampin e Olou në Finlandë, realiteti ishte ndryshe:

“Që kur isha fëmijë, më ka pëlqyer gjithmonë të luaja futboll. Mirëpo, të gjithë më thonin se duke i mëshuar topit nuk do të arrija ta siguroja një punë. Por, unë në fund ia dola”, thotë ish-futbollisti kosovar në një intervistë për “gianlucadimarzio.com”, përcjell “Gazeta Express”.

Më pas, ish-futbollisti i Chievos e ka kujtuar fëmijërinë e vështirë dhe rrugëtimin e tij drejt suksesit.

Ndonëse e përfaqësoi Finlandën, ish-futbollisti luftarak dhe i palodhshëm asnjëherë nuk ka pranuar të luajë kundër vendit të prindërve të tij, për të cilin i rrah zemra – Kosovës.

“Kur nisi lufta, nuk ishte asgjë e lehtë. Shumë familjarë të mi e humbën jetën. Xhaxhai im u vra. Ishin momente të rënda, të tmerrshme.”

“U largova nga Kosova me familjen time para se të fillonte lufta. Në vitin e parë në Finlandë jetuam në një kamp refugjatësh.”

“S’kishim informacione për familjarët, veç ato që i shikonim në televizor. Ishin momente të vështira.”

“Kam refuzuar gjithmonë të përballesha me Kosovën në fushën e blertë, nuk do të mundë ta bëja këtë kurrë. Unë i bëj gjërat me zemër, në fushë nuk do të isha i njëjti.”

Futbollisti drenicas ishte pensionuar nga futbolli në dhjetor të vitit të kaluar tek Helsinki në Finlandë, ku tash është trajner i ekipit U-23.

Ndërkohë luan për qejf në një ligë amatore dhe të veçantë, ku paraqiten këngëtarë, artistë, youtuber dhe influencerë të njohur finlandez