Ndihmës Sekretari i Byrosë për Çështjet Evropiane dhe Euroaziatike James O’Brien dhe i dërguari i Shteteve të Bashkuara për Ballkanin Perëndimor, Gabriel Escobar janë deklaruar përmes përmes një video-lidhjeje për zhvillimet e fundit. Escobar qe i pranishëm por fjalën e mori O’Brien, shkruan gazeta projekti.
Biseda pati në fokus Ballkanin. O’Brien diskutoi për 25-vjetorin e fillimit të bombardimeve të NATO-s në territorin e Kosovës ndaj objektivave ushtarake dhe policore serbe, dhe rrugën më të qëndrueshme dhe të sigurtë drejt Ballkanit Perëndimor.
“Jemi të gjithë bashkë. Vendimi për të përdorur forcë atëkohë nga NATO-ja, ishte i obligueshëm. Besuam se ishte i vetmi veprim që duhej marrë për të ndaluar atë që po ndodhte në Kosovë. Në fund, gjetëm paqe dhe njerëzit u kthyen nëpër shtëpitë e tyre. Vendimi për të vepruar me forcë, ishte vendimi që sot festojnë 25-vjetorin. Të gjitha qeveritë e atëhershme punuan bashkë për të ndaluar dhunën. Tash jemi në një situatë ku vendet e Ballkanit Perëndimor duan të bashkohen në Bashkimin Evropian”, u shpreh O’Brien.
Raportet mes Kosovës dhe Serbisë
Kosova dhe Serbia, tha Ndihmës Sekretari i Byrosë për Çështjet Evropiane dhe Euroaziatike James O’Brien, duan të jenë pjesë e Bashkimit Evropian.
Pas një pyetjeje, ka komentuar pak edhe pamjet që ka publikuar kryeministri i Kosovës, Albin Kurti, duke alarmuar se njësi të specializuara të ushtrisë së Serbisë janë vërejtur vetëm disa metra larg kufirit me Kosovën, duke shtuar se është i vetëdijshëm se “Forcat e Armatosura të Serbisë janë duke realizuar stërvitjet e rregullta dhe ato janë duke i përdorur si pretekst për të shkaktuar provokime të qëllimshme”.
“Po punojmë me qeveritë për të gjetur zgjidhje. Vuçiqi e di mirë se çfarëdo përdorimi i forcës ndaj Kosovës do të ishte i papranueshëm dhe kjo i vë në rrezik ushtarët e NATO-s që janë atje për të mbrojtur popullatën serbe dhe shqiptare. Çështja kyçe këtu është se palët duhet t’i reduktojnë tensionet, edhe ato që ndërlidhen me ushtrimet e ushtrisë përreth kufirit. Çështja është se të dyja palët duhet të punojnë. E kemi bërë të qartë që individët që morën pjesë në sulmin e shtatorit (në Banjskë) duhet të dalin para drejtësisë dhe kjo do të bëhet”, u shpreh O’Brien.
Çështja e dinarit
Gjithashtu, James O’Brien në video-lidhje me gazetarët foli edhe për çështjen e dinarit.
“Po shpresojmë që në ditët e ardhshme, Kosova do të marrë veprime konkrete për dinarin, që lidhen me këshillat tona. Çfarë duam të shohim është… progres. Kjo është edhe ajo në çka po punon i dërguari i BE-së Miroslav Lajçak. Kosova është edhe pak hapa larg anëtarësimit në Këshillin e Evropës, një prej tyre ishte vendimi për Manastirin e Deçanit. E kemi mirëpritur këtë veprim. Mori kohë, por megjithatë u mor vendimi. Po ashtu Kosova duhet të lëvizë përpara me themelimin e Asociacionit para se Këshilli i Evropës të vendosë për anëtarësim. Ne e mbështesim Kosovën në rrugën drejt anëtarësimeve. Por Qeveria e Kosovës duhet të marrë edhe veprime të vështira ndonjëherë”, u shpreh O’Brien, transmeton gazeta online Reporteri.net.
“Escobari udhëtoi në Kosovë, dhe tha se kjo çështje (e dinarit) është e komplikuar. Miqtë e Kosovës, po i kërkojnë qeverisë të marrë veprim të duhur, të shkojë një hap prapa sa i përket dinarit, dhe njerëzit atje të jetojnë si duhet dhe një mëngjes, të zgjohen dhe të dalin të blejnë çfarë të duan. Ata duhet të paguajnë edhe rrymën”, u shpreh O’Brien.
