Shkruan: Argjend Zejnaj

“I like pizza, I like flli” thotë Rita Ora, kur e pyesin për: “Çka të pelqen në vendin e origjinës”?

A ju dukej se po bëhen punë të mëdha në ditët e para pas “revolucionit elektoral” të #14shkurtit 2021?

Sigurisht që po! Sidomos syrit, mendjes dhe zemrës së militantit.

Të nesërmën e fitores së Partisë Vetëvendosje disave u dukej se filluan të marrin rrjedhën e duhur gjërat, ato gjërat që u “çakorduan nga regjimi i vjetër”.

“Korrupsioni u ndal, arsimi mori hovë, ashtu sikur edhe ekonomia dhe shëndetësia,…” (që një kohë të gjatë ishte pa ministër). Mos të flasim për remitencën e diasporës tonë, e cila u derdh e tëra në një fond, që herë quhej, “Fondi i Pandemisë”, pastaj edhe “Fondi i Sigurisë” – ky i fundit për të blerë armë e municione për FSK-n. Merrne me mend, pas më shumë se dy dekadave me shtet të lirë, ende ka nevojë për organizime financiare joformale për të mbajtur gjallë shëndetësinë e për të blerë armë për ta mbrojtur vendin, po kjo përveç një ogurzi i gabuar i mbjellë nga qeveria, asgjë tjetër nuk ka reprezentuar.

Sot kur ke çdo gjë legale-formale, pse duhet me hapë llogari bankare për të derdhur fonde, joformale, për kinse, në mbështetje të Ushtrisë së Kosovës, e cila zatën, asnjë lopat nuk arrinë me ble, pa ia dhënë krahun ShBA-ja.

Por deri dikund e kuptueshme për qeverinë Kurti2 dhe për popullin që e votoj, me u marr me këso lloj organizimesh, se u ndjenë diçka afër euforisë, sepse ajo ishte një fitore e madhe elektorale për ta, pas shumë orvatjeve opozitare për të treguar sa të zot janë.

Por sot ku e ka degdisur vendin ajo “fitore plebishitare”, me plotë kuptimin e fjalës, në asgjëkundi. Në disa segmente të brendshme, jemi në vendnumro, në disa të tjerë kemi prapakthim, e në atë kryesorët, politikë të jashtme dhe sigurisë, jemi në çakordim të plotë. Po humbim ose humbëm mundësinë e ndryshimit të mirëfillt, për të marrë edhe ndonjë njohje, sepse tani ka filluar të ripotencohet fakti i gjendjës së pasigurisë në veri të vendit tonë nga vendet që kanë qenë me njerën këmbë kah vendimi për njohje të Kosovës e me këmbën tjetër nga të bërit qejfin Serbisë. Veriun e rikthyem në anarki, e kthyem në vitet 2007/2008, çdo ditë po rreshqet mbrapa të vitet 2004/2005 dhe tutje ende ma keq, në 1999/2000, ku askush s’ka guxu diçka me vepru, pa thënë KFOR-i Francez.

Qeveria Kurti2 po na tregon filma të “James Bond”, duke e shfaqur në veri, ministrin e brendshëm, i cili për nga veshja po e kopjon, ministrin e brendshem të Serbisë, Vulinin, ndërsa për nga strukturimi dhe logjisitika në mbeshtje te policisë, të cilët shumë pafajshëm u gjetën nga të qenurit në shërbim të zakonshëm, në atë të jashtëzakonshëm, me ndërrime edhe deri në 18 orë, e shteti ynë, shteti i “James Bond”-it, po ju bëjnë thirrje popullit t’u dërgojnë pica, e bizneset t’ua paguajn sigurimin shëndetësor. Dmth shteti që thotë se është në gjendje me ndërmarr çdo hap të nevojshëm për të ruajtur tërësinë territoriale e të sovranitetit, po ua mbush barkun policisë me brum, pica e fli, ndërsa ushqimet për të tilla situata, duhet të jenë shumë kalorike dhe pa përmbajtje brumi.

Gjithësesi, “I like pizza, I like flli” thotë Rita Ora, kur e pyesin për: “Çka të pelqen në vendin e origjinës”?

Por shteti nuk mbahet sovran me pica, por me politikë të mençur e pa popullizëm.