Kryetari i AAK-së, Ramush Haradinaj, bashkë me dy deputetët Time Kadrijaj e Bekë Berisha po qëndron në Gjermani.

Ai ka takuar atje bashkatdhetarë e zyrtarët të partisë, ku thotë se i ka informuar për situatën politike, të sigurisë dhe atë energjetike në Kosovë, si dhe ua ka sqaruar procesin e arritjes së marrëveshjes finale obligativo-ligjore për njohje reciproke mes Kosovës dhe Serbisë.

Postimi i tij:

Emocion i veçantë sa herë takohem me bashkatdhetarë. Gjatë qëndrimit në Gjermani, ndjehem krenar kur takoj arkitektë, artistë, inxhinierë, mjekë, ndërmarrës të zotë, që jo vetëm na bëjnë krenarë për suksesin e tyre individual, por i japin paraqitjen e merituar Kosovës. Falë tyre, bota e njeh realitetin që edhe ne ndajmë aspiratat dhe vlerat njëjta europiane.

Së bashku me deputetët Time Kadrijaj dhe Bekë Berisha, sot në tubimin e organizuar nga bashkatdhetarët në Bad Salzuflen, shpreha falënderimin për shtetin gjerman, që po vazhdon me qëndrim konsistent, në favor të integritetit territorial dhe shtetësisë së Kosovës.

I informova për situatën politike dhe atë të sigurisë në Kosovë, krizën ekonomike dhe energjetike në vend, e po ashtu kam sqaruar procesin e arritjes së marrëveshjes finale obligativo-ligjore për njohje reciproke mes Kosovës dhe Serbisë. Bashkatdhetarët u interesuan edhe për rolin e Aleancës në opozitë dhe po ashtu mora lajme të mrekullueshme për aktivizimin si asnjëherë më parë të mërgatës për Aleancën dhe vizionin e saj.

Falënderova kryetarin e AAK-së për Gjermani, Ukë Blakaj, si dhe i urova suksese kryetarit të sapozgjedhur për Bad Salzuflen, Republika North Rhine-Westphalia, Shkelzen Fetahaj.

Mërgata jonë ndër vite ka qenë shtyllë e konsolidimit të shtetësisë së Kosovës, përkrahje e parezervë e ekonomisë, e tani model i suksesit dhe të arriturave. Duke qenë gjithmonë mirënjohës për dedikimin e tyre të pakusht ndaj Atdheut, i sigurova se Aleanca i ka dyert e hapura për secilin prej tyre.