Humori anglez është i pakonkurrencë. Në masë të madhe është i tillë për shkak se anglezët e kanë traditë humorin dhe se me këtë zhanër, shumë të vështirë, janë marrë kryesisht njerëzit e arsimuar në universitetet më të mira të këtij vendi. Fjala është për Mr. Bean, Monty Python, Blackdder, Fawlty Towers, Yes Minister, etj.
Por, komedia më e suksesshme angleze në këtë vend dhe me siguri edhe në botë, është ‘Only fools and horses’ (Vetëm kuajt dhe budallenjtë), e cila është krijuar nga John Sullivan, një irlandez i lindur në Londër. Madje, Sullivan, ka vetëm shkollim fillor. Ai ka prejardhje nga klasa punëtore dhe që në rini ka bërë punë të rënda dhe pak të paguara. Por, ka lexuar shumë. Dikur i lindë ideja që të shkruaj skenare të humorit, por nuk e merr askush seriozisht se nuk ishte i shkolluar. Më në fund punësohet në BBC për të bërë punë të zakonshme fizike, por me qëllim që të depërtoj te regjisorët. Dhe, Sullivan ia doli. Shkroi skenarë dhe krijoi shumë komedi superlative, përfshirë ‘Only fools and horses’.
Kjo komedi është shfaqur edhe në Kosovë (KTV) pas luftës dhe më duket se është përkthyer si ‘Haverat’. Nuk e di sa ka qenë e popullarizuar, por është komedi sipërore. Në realitet, edhe nëse përkthehet në shqip fjalë për fjalë ‘Vetëm kuajt dhe budallenjtë’, ka kuptim. Këtu fjala është për thënien se vetëm kuajt dhe budallenjtë punojnë. Dy vëllezërit, personazhet e kësaj komedie, mundohen të pasurohen (të bëhen milionerë) duke shitur mallra të dyshimta dhe duke iu ikur tatimeve. Pra, duke bërë punë të lehtë ose duke mos punuar, mundohen të pasurohen.
Sullivan e ka njohur mirë mentalitetin e personazheve, kryesisht të klasës punëtore londineze, në këtë komedi për shkak se ai ka jetuar e punuar në ato rrethana. Dmth Sullivan shkruan nga përvoja e jo nga imagjinata dhe këtu duhet kërkuar suksesin e tij.
Rasti i skenaristit John Sullivan bënë me dije se nuk duhet të jeni domosdoshmërisht i shkolluar për sukses nëse keni talent dhe nëse lexoni. Gjithmonë e gjeni rrugën e suksesit nëse e kërkoni me ngulm.
