Fjalën i pari e mori kryetari i partisë, i cili ka thirrur këtë tryezë, Albin Kurti, duke thënë se Kosova nuk mund të vazhdojë të qeveriset nga një pakicë parlamentare.
Kurti fjalën e nisi me kritika për Qeverinë “Haradinaj” e presidentin Thaçi.
Ai përmendi shumë çështje për të cilat thotë se shteti ka dështuar, siç është deportimi i gylenistëve, procesi i shpronësimit në Hade e Shipitullë, ratifikimi i një marrëveshje me të cilën Kosova humb territor, themelimi i një marrëveshje të dëmshme për Kosovën, siç e quan ai Asociacionin.
“Çka di ky kryeministër. Atë e ka marrë Thaçi me qira për Demarkacionin. Nëse ka veç pak etikë, ai duhet të japë dorëheqje e vendi të shkojë në zgjedhje të parakohshme. Ky kryeministër për karrige e bën edhe Zajednicën”, ka thënë Kurti.
“Haradinaj duhet të japë dorëheqje, ose ne si opozitë në Kuvend e iniciojmë mocionin e mosbesimit”, tha tutje Kurti.
Përndryshe, PDK, AAK, Nisma dhe PSD, janë shprehur kundër që temë kyçe e tryezës së partive politike të thirrur nga VV-ja, të jetë konsensusi për zgjedhje të parakohshme, VV-ja vazhdon të insistojë që kjo temë, duhet të jetë temë qendrore e tryezës.
