Kryeministri i Republikës së Kosovës, Albin Kurti ka folur për situatën e krijuar në Bosnje dhe Hercegovinë, pas deklaratave të udhëheqësit serb të Bosnjës, Millorad Dodik, i cili është duke kërcënuar me ndarjen e Republika Sërpskës – entitet i banuar me shumicë serbe – nga pjesa tjetër e Bosnjës.
Ai tha se zhvillimet në Bosnje lidhen me Kosovën, shkruan Reporteri.net.
“Zhvillimet në Bosnje ndërlidhen me Kosovën në kuptimin që e kanë të njëjtin problem aspiratën hegjemonike nacionaliste të Beogradit, i cili vazhdon të vajtojë për humbjet që shtetit të Serbisë ia ka shkaktuar. Unë besoj që Serbia duhet të emancipohet prej viteve të 90’ta që i shkaktoi katër luftëra në Slloveni, Kroaci, Bosnjë Hercegovinë si dhe në Kosovë, me c’rast në këto dy të fundit edhe kreu gjenocid.”, tha kryeministri Kurti në Prizren.
Lexo edhe: Hoxhaj kritika Qeverisë për mospjesëmarrje në samitin OKB-së për klimën
Kujtojmë se situata në Bosnje është përkeqësuar pas deklaratave të Dodik.
Madje gazeta britanike Guardian dje e ka cituar përfaqësuesin e lartë të komunitetit ndërkombëtar në Bosnje e Hercegovinë, Christian Schmidt, të ketë thënë se ky vend “është në rrezik të menjëhershëm për t’u shpërbërë” dhe se ekzistojnë gjasa “shumë reale” për rikthimin e tij në konflikt.
Përfaqësuesit e Republikës Sërpska janë duke e bojkotuar punën e institucioneve qendrore të Bosnjës që nga fundi i korrikut, kur paraardhësi i Schmidtit, Valentin Inzko, ka vendosur një ligj që ndalon mohimin e gjenocidit dhe krimeve të tjera të luftës në Bosnje.
