Armend Zemaj nga Lidhja Demokratike e Kosovës pas përfundimit të mbledhjes së Kryesisë së Kuvendit tha se janë grumbulluar shumë pika të rendit të ditës dhe kjo me fajin siç tha “të kësaj mazhorance minore e cila është duke e prishur raportin kushtetues në mes Kuvendit dhe Qeverisë”.
Zemaj tha se ikja e kryeministrit Ramush Haradinaj nga përgjegjësia për të raportuar në Kuvend, po ndikon edhe në caktimin e seancave të reja parlamentare.
Ai shprehu shqetësimin për mungesën e qeverisë në seancat e Kuvendit, grumbullimin e pikave të rendit të ditës dhe mungesën e deputetëve të pozitës në senaca.
Sipas tij, kjo tregon brishtësinë institucionale dhe me këtë logjikë është e pamundur të funksionojë kuvendi i Kosovës.
Zemaj duke folur për seancën e 17 majit tha se LDK sot ka futur në procedurë të rregullt tri projektligje, atë për tatimin në të ardhurat personale, plotësim ndryshimin për të ardhurat e korporatave, Projektligjin për vlerën e shtuar, si dhe formimin e Komisionit hetimor për dëbimin e gjashtë shtetasve turq.
