Projektligji për rimëkëmbje ekonomike i cili është votuar sot nga 64 deputetë, pritet të kalojë në lexim të dytë pas dy javësh. Kështu ka bërë me dije shefi i grupit parlamentar të LDK-së, Arben Gashi.

“Unë kam propozuar që sot të bëhet edhe leximi i dytë me arsyetimin se të gjitha grupet dhe deputetët janë të gatshëm që të propozojnë ndryshimet e mundshme, ky propozim i imi duhet të përkrahet nga 2/3 e deputetëve të pranishëm (gjë që nuk ndodhi në seancë), mbetet që pas dy javësh ta kalojmë në leximin e dytë”, ka thënë Gashi për “Express”.

Projektligji për rimëkëmbje ekonomike, ndër të tjera, do t’u mundësonte qytetarëve kontributpagues të tërheqin 10 për qind të mjeteve nga llogaria e tyre në Fondin e Kursimeve Pensionale të Kosovës.