Kryeministri Avdullah Hoti ka thënë se në dy javët e fundit, numri i të prekurve me Covid-19 ka qenë në rënie, me rreth 30 raste aktive për çdo 100 mijë banorë.

Por, parashikimet sipas tij, janë se ky numër shpejt mund të kalojë shifrën prej 50, dhe atëherë sipas protokolleve duhet shtrënguar masat, siç po ndodh në shumicën e vendeve të BE-së.

“Brenda javës së fundit është shtuar me 30 për qind numri i hospitalizimeve. Në anën tjetër, nxënësit që kanë rezultuar pozitivë me Covid-19 si përqindje e numrit të nxënësve të testuar është i lartë, që është rrezik serioz i përhapjes së virusit. Prandaj, të gjithë duhet të kemi mirëkuptim për shtrëngimin e masave në javët në vijim, që përfshijnë ndërprerje të tubimeve të mbyllura, kufizime të çdo aktiviteti ku mblidhen qytetarë, kontroll rigoroz i shkollave për përmbushje të masave për mbrojtjen nga Covid-19 dhe masa të tjera”, ka shkruar Hoti në llogarinë e vet në “Facebook”.

Ai ka thënë se inspektoratet dhe institucionet e tjera mbështetëse, qendrore dhe lokale, do të përgatisin planet e tyre të veprimit për të mbikëqyrë zbatimin e masave.