Jo thjesht talenti, magjitë dhe frymëzimi që dhuronte në futboll. Diego Armando Maradona është përfolur shumë edhe për jetën jashtë futbollit, diçka e cila vazhdon edhe tani kur bota është në zi për humbjen e një prej më të mëdhenjve të historisë.

Ndërsa, autoritetet në Argjentinë vijojnë hetimet për shkaqet e vdekjes së sulmuesit legjendar, çështja më e nxehtë e momentit është ndarja e pasurisë së “Pibe de Oro” mes fëmijëve të shumtë. Sipas njerëzve të afërt të familjes, pasuria e trashëguar nga vdekja e Maradonës është rreth 75 milionë dollarë.

Ajo përbëhet nga pasuritë e paluajtshme të shpërndara në të gjithë botën, sponsorizime, investime të ndryshme në Venezuelë dhe Itali, shtëpi dhe automjete luksi të lëna në Dubai, por edhe një unazë e çmuar e madje një automjet amfib në Bjellorusi, i njëjti që u prezantua si president i skuadrës së Dynamo Brest.

Problemi është si do të ndahet pasuria e lënë nga legjenda argjentinase. Maradona ka pesë fëmijë të njohur zyrtarisht, nga katër nëna të ndryshme, nga të cila vetëm njëra është ish-bashkëshortja ligjore.

Megjithatë, janë edhe të paktën gjashtë fëmijë që pretendojnë njohjen e atësisë nga ish-futbollisti, nga të cilët dy janë në Argjentinë dhe të paktën katër në Kuba.

Maradona jetoi nga viti 2000 deri më 2005-n në ishullin e Karaibeve, aventurë në të cilën dyshohet se ka lënë shumë pasardhës, të gjithë nga mosha 19 deri në 21 vjeç.