Presidenti serb, Aleksandar Vuçiq, ka thënë se takimi i ardhshëm në mes të Kosovës dhe Serbisë mund të ndodhë në muajin shtator dhe një takim i tillë pritet të organizohet nga presidenti francez, Emmanuel Macron.

“Unë besoj se një lloj vazhdimi i Berlinit, domethënë takimi i Parisit do të jetë në shtator”, deklaroi Vuçiq para gazetarëve, transmeton lajmi.net.

Sipas tij, Kosovës dhe Serbisë i duhet kohë që të qartësojnë e të bisedojnë disa gjëra.

“Urrej t’ia vë fajin palës tjetër. Le të presim që forcat e mëdha të bëjnë gjënë e tyre dhe pastaj do të shohim se çfarë mund të bëjmë ne”, u shpreh Vuçiq.

Në anën tjetër, presidenti francez, Emmanuel Macron, i cili po qëndron për vizitë zyrtare në Beograd, gjatë ditës së djeshme ka thënë se së bashku me kancelaren gjermane, Engela Merkel, do të zhvillojnë takime të veçanta me udhëheqësit e Kosovës dhe Serbisë, me qëllim që të mundësohet arritja e marrëveshjes.

Samiti i Parisit i paraparë më 1 korrik, dështoi për shkak të mospajtimeve mes paleve.