Pas dorëheqjes nga pozita e kryetarit të bordit të RTK-së, Besnik Boletini ka drejtuar gishtin nga Adri Krasta, zëvendësdrejtor i Përgjithshëm i Radio Televizionit të Kosovës, duke thënë se nuk po ka vullnet për të për të marrë masa ndaj atyre që e shkaktuan skandalin.
Pas kësaj ka reaguar, Isa Myzyraj, kryetari i Asociacionit të Gazetarëve në Shqipëri, i cili është shprehur i zhgënjyer me Krastën.
Myzyraj ka thënë se Krasta ka pasur guxim në Shqipëri për t’iu kundërvënë pushtetit, dhe për këtë të gjithë i duan monologjet e tij.
“Adi Krasta është një figurë e nderuar në publikun shqiptar në Shqipëri. Të gjithë i duam monologjet e tij, të gjithë jemi impresionuar nga guximi që ai ka në Shqipëri për t’iu kundërvënë pushtetit.” – ka shkruar Myzyraj.
Por sipas tij, Krasta me shumë pushtet në Kosovë është duke e treguar të kundërtën e asaj që e ka thënë e bërë në Shqipëri.
“Po i njëjti me shumë pushtet në Kosovë (Zv.Drejtor i Përgjithshëm i Radio Televizionit të Kosovës) është duke treguar krejt të kundërtën e asaj që ka thënë e bërë në Shqipëri. Ky është zhgënjim i madh.” – ka shkruar Myzyraj.
